ગુજરાતનો એક એવો ઉમેદવાર જેની બે પત્નીઓ ચૂંટણી પ્રચારમાં ઉતરી
લોકસભા ચૂંટણીનો શંખનાદ વાગી ગયો છે. ગુજરાતમાં પણ લોકસભા ચૂંટણીને લઈને તમામ પાર્ટીઓ મેદાનમાં ઉતરી ગઈ છે. ગુજરાતમાં હાલ તમામ પાર્ટીઓ દ્વારા જોરશોરથી પ્રચાર ચાલી રહ્યો છે. તમે પુત્રો, પિતા, પતિ અને પત્નીઓને ચૂંટણીમાં એકબીજા માટે પ્રચાર કરતા જોયા અને સાંભળ્યા જ હશે, પરંતુ ગુજરાતમાં એક એવી લોકસભા બેઠક છે જ્યાં બે-બે પત્નીઓ એક પતિ માટે ચૂંટણી પ્રચાર કરી રહી છે. આ ઘટના ગુજરાતની ભરૂચ સીટ પર જોવા મળી રહી છે જ્યાં તેમની બે પત્નીઓ શકુંતલા અને વર્ષા તેમના પતિ અને આમ આદમી પાર્ટીના ઉમેદવાર ચૈતર વસાવા માટે પ્રચાર કરી રહી છે.
ચૈતર વસાવા આ આદિવાસી બહુલ બેઠક પરથી પહેલીવાર લોકસભાની ચૂંટણી લડી રહ્યા છે. ચૈતરના માર્ગને સરળ બનાવવા માટે તેમની બંને પત્નીઓ ભરૂચમાં ડોર ટુ ડોર પ્રચાર કરી રહી છે. એક તરફ ચૈતર વસાવા પુરૂષો અને યુવા મતદારોને મળીને તેમના મંતવ્યો રજૂ કરી રહ્યા છે, તો બીજી તરફ તેમની પત્નીઓ મહિલા મતદારોને રીઝવવામાં વ્યસ્ત છે.
ચૈતર વસાવાએ 2014માં રાજકારણમાં પ્રવેશ કર્યો હતો. ચૈતર વસાવા તે સમયે ગુજરાતમાં સરકારી નોકરીમાં કામ કરતા હતા. રાજકારણમાં આવવા માટે તેમણે નોકરીમાંથી રાજીનામું આપ્યું હતું. શરૂઆતમાં ચૈતર છોટુભાઈ વસાવા ભારતીય ટ્રાઈબલ પાર્ટી (BTP)માં જોડાયા. 2017માં જ્યારે છોટુભાઈએ તેમના પુત્રને ડેડિયાપરા બેઠક પરથી મેદાનમાં ઉતાર્યા ત્યારે કમાન ચૈતરને આપવામાં આવી હતી. 2022ની વિધાનસભા ચૂંટણી પહેલા ચૈતરે BTP સામે બળવો કર્યો હતો. ચૈતર વસાવાએ છોટુભાઈ પર તેમની ઈચ્છા મુજબ પાર્ટી ચલાવવાનો આરોપ લગાવ્યો હતો.